प्रतिनिधी|जालना
जालना शहरात मतदान करण्यासाठी बाहेर पडलेल्या मतदारांवर पिसाळलेल्या एका कुत्र्याने हल्ला केल्याची घटना घडली आहे. या हल्ल्यात 10 ते 15 जण जखमी झाले असून त्यांच्यावर जिल्हा रुग्णालयात सध्या उपचार सुरू आहे.
या घटनेविषयी सविस्तर माहिती अशी की, 15 जानेवारी 2026 रोजी दुपारी 3 वाजेच्या सुमारास जालना शहरातील सरस्वती भुवन आणि शनी मंदिर परिसरात तसेच काली मज्जिद परिसरात मतदान करण्यासाठी बाहेर पडलेल्या काही मतदारांवर व नागरिकांवर एका पिसाळलेल्या कुत्र्याने हल्ला केला आहे. एका मागोमाग एक या कुत्र्याने नागरिकांना चावा घेतला आहे. कोणाचे पायाचे लोचके तोडले, तर एका जणांच्या हाताचा करंगळी तोडून या पिसाळलेल्या कुत्र्याने जखमी केले आहे.
या पिसाळलेल्या कुत्र्याने केलेल्या अचानक हल्ल्याने शहरातील नागरिक भयभीत झाले असून या कुत्र्याचा तात्काळ महापालिका प्रशासनाने बंदोबस्त करून शहरातील नागरिकांना भयमुक्त करावे अशी मागणी सुद्धा या नागरिकांनी केली आहे. मोठेच नाही तर लहान मुलांना सुद्धा या पिसाळलेल्या कुत्र्याने चावा घेतल्याची माहिती आहे. मुलांच्या आई-वडिलांनी आणि रुग्णांच्या नातेवाईकांनी जिल्हा रुग्णालयात एकच गर्दी केल्याचे पाहायला मिळाले असून तात्काळ महापालिका प्रशासनाने या पिसाळलेल्या कुत्र्यांचा बंदोबस्त करावा अशी मागणी शहरातील नागरिकांनी केली आहे. या घटनेने मात्र, परिसरात कुत्र्यांची दहशत पसरली आहे.
यामध्ये जखमींची नावे पुढीलप्रमाणे आहे.
शिवराज गणेश वेव्हारे
शेख मोबीन
तारेख सुबानी
पूर्वेस कृष्णा सुपारकर
नासेर चाऊस
राजश्री कसबे
शेख रीहान
सैय्यद सलादीन
अमिनोदिन शेख
मोहसिन कुरेशी
आसिफ कुरेशी
संगीता अशोक साळवे
स्नेहा श्रीनिवास येमुल
शेख अतिक.
दोन जणांची प्रकृती गंभीर असल्याची माहिती
यासंदर्भात जिल्हा रुग्णालयातील डॉक्टर यांच्याशी संपर्क साधला असता यामध्ये दोन जणांची प्रकृती गंभीर असून एकूण 15 जणांना या कुत्र्याने चावा घेतला असल्याची अधिकृत माहिती डॉक्टर आशिष देवडे यांनी प्रसारमाध्यमांना दिली आहे.
